近年嚟港澳地區興起手工啤酒(Craft Beer) ，越嚟越多人講起「手工啤酒」，咁到底手工啤酒同普通啤酒有咩吾同？又係米真係好飲啲？

美國釀酒師協會 (Brewer's Association) 將Craft beer 定義為「產量少、獨立製造、以傳統手法釀製」。產量少要少到咩程度？「年產量少於600萬桶」；獨立製造即係釀酒廠嘅股份入面大酒廠吾可以佔多過25%；傳統手法製造又係咩？簡單嚟講，就係唔接受大酒廠用粟米或者米去「溝淡」啤酒嘅手法。
 

 Craft Beer

 

點解會出現Craft Beer？

咁就要反到去1978年講起喇，當時全美國所有大牌酒廠都只係會釀造一種好淡嘅啤酒，令美國啤酒同「千篇一律、淡而無味、低質素」劃上等號，呢個時候，美國咁啱又放寬喺屋企釀酒嘅限制，令家釀啤酒 (homebrew) 變得合法。好多喺屋企釀酒嘅人，發覺自己釀得仲好飲過出面有得賣嘅酒，於是決定自立門戶，成立酒廠，生產更高質素嘅啤酒，滿足對啤酒質素有要求嘅大眾。

獨特之處

一般嚟講手工啤酒只用純正大麥小麥製造，吾似普通啤酒為咗壓低成本而加入粟米，亦會講究啤酒花嘅品種同新鮮嘅程度，製作過程之中亦吾會添加促進防腐劑等各種化學原料，飲嘅過程亦有講究，第一就係一定會倒入杯飲，咁樣先可以飲到啤酒最重要嘅泡沫，其次係溫度吾可以太低，最好響4度以上飲，先可以飲到啤酒真正嘅香味，味道越重越苦嘅啤酒，飲嘅溫度就要越高。

香港將Craft Beer 譯做「手工啤酒」，但亦開始有人會將Craft Beer叫做「精釀啤酒」，Craft Beer 嘅出現，係人對啤酒嘅質量追求，當中蘊含住一種對啤酒「重視質素、精益求精」嘅態度。