六大基酒之白蘭地 Brandy
相信六種基酒中最常聽到嘅酒就係白蘭地。無聽過？咁總有聽過「干邑Cognac」、「V.S.O.P」、「X.O」、「LouisXIII」掛？如果你有聽過以上嘅名而又話自己無聽過白蘭地呢種酒，咁你就要睇落去喇！
Brandy
首先，威士忌同白蘭地都係屬於烈酒，兩者都係用蒸餾嘅方法去提高酒精嘅濃度，再用木桶陳年，酒精度一般都高達40%以上，而兩者最大嘅分別就在於原料。威士忌(Whisky)係有以穀物作為原料所製造出嚟嘅蒸餾酒嘅總稱，白蘭地(Brandy)就係所有以水果為原料嘅蒸餾酒嘅總稱。而原料吾同都會令酒體出現分別，一般嚟講白蘭地嘅色澤會比威士忌更深，也都會更加濃稠。
咁干邑(Cognac)又係咩？
同香檳、Tequila情況一樣，干邑係一個法國嘅法定產酒區所產嘅白蘭地，只有用干邑城鎮生產嘅葡萄所釀造嘅白蘭地酒先可以冠上「干邑」之名，一般而言干邑嘅生產法規比較嚴格，價格亦比普通白蘭地貴好幾倍。港澳所流行嘅品牌「軒尼詩」(Hennessy)、「人頭馬」(Remy Martin)都係干邑白蘭地。
「V.S.O.P」、「X.O」、「LouisXIII」
大部分干邑白蘭地等級可以分為：
「三星」：酒響混合嘅時候，吾同年份嘅酒入面最年輕嘅酒儲存最少有三年。
「V.S.O.P」：調配嘅酒裡面最年輕嘅酒最少已經陳年五年。
「NAPOLEON」：代表調配好嘅白蘭地最年輕嘅酒需要有七年。
「X.O」：酒齡有二十五年。
「LouisXIII」：50年以上。
