酒知識｜可樂可以這樣喝？！【女性必收藏】
點解好地地講講下酒要講可樂？既然係酒知識，響呢到講到可樂，當然係想講比大家知，酒同可樂其實可以好夾，今日就同大家講解一下可樂調酒大全，簡單又好飲，等你響屋企都可以享受微醺嘅樂趣！
首先講下點解世界上千千萬種飲料，偏偏要揀可樂嚟講先喇。原因有三！
1. 材料好準備 – 真係簡單到你吾信。
2. 調製簡單 – 完全係技術含量。
3. 接受度高 – 就算平時吾飲酒嘅人都會講一句「正！」
自由古巴(Cuba Libre)
01
材料：蘭姆酒(60ml)、檸檬角、可樂(150ml)
做法：杯加滿冰，加入蘭姆酒、輕輕擠壓檸檬角丟入杯、再加滿可樂，搞掂！除左一般白色蘭姆酒之外，重可以試下用加入左香料嘅蘭姆酒或者陳年蘭姆酒，更加有風味！
威士忌可樂 Whisky Coke
02
如果話自由古巴可樂同酒嘅味道比較中性，威士忌可樂嘅個性就會更加強一啲。有人會用自己波本威士忌嚟調製（所以亦有人稱為波本可樂Bourbon Coke），但係基本上調酒呢件事就係隨意嘅事，你絕對可以用你中意嘅威士忌嚟調製。
材料：威士忌(30ml)、檸檬角、可樂
做法：杯加滿冰，加入威士忌、輕輕擠壓檸檬角丟入杯、再加滿可樂，搞掂！無錯，同上一段「自由古巴」嘅做法就係一樣，只係換咗個主角！
長島冰茶Long Island Iced Tea
03
為左避免被人懷疑小編一直複製貼上，最後嚟一個進階版，保證吾再係同上兩款酒嘅做法一樣！Long Island Iced Tea係每間酒吧必備嘅調酒，亦都係經常會聽到嘅調酒，有一個聽落人畜無害嘅名同外表，但佢絕對可以「醉」人於無形，酒精含量絕對吾可以睇少！
材料：伏特加(15ml)、龍舌蘭(15ml)、琴酒(15ml)、蘭姆酒(15ml)、橙皮酒(15ml)、檸檬汁 15ml、檸檬角、可樂
做法：將所有酒、檸檬汁同冰通通丟進雪克杯(Shaker)裡用力搖一搖，再倒入Highball杯入面。加入少少可樂上色，調整到你覺得似嘅紅茶顏色，再丟入檸檬角做裝飾，屬於你嘅Long Island Iced Tea就完成喇！
